Генералниот директор на Светската здравствена организација (СЗО), Тедрос Аданом Гебрејесус, изрази желба за продолжување на соработката со Соединетите држави, и покрај најавата на американскиот претседател Доналд Трамп за прекинување на врските со агенцијата на ООН. „Придонесот и дарежливоста на владата на САД и граѓаните во светското здравство е огромен со децении и даде големи придобивки за јавното здравство ширум светот. СЗО сака оваа соработка да продолжи“, рече Греберејесус на виртуелната прес-конференција.
Среде пандемијата на вирусот корона, Трамп го прекина финансирањето на СЗО, за кое го обвинува за занесеност кон Кина и во петокот најави дека Соединетите држави ги прекинуваат врските со оваа агенција на ООН. „Соединетите држави ќе ги пренасочат средствата кон други итни и глобални јавни здравствени потреби што го заслужуваат тоа“, им рече тој на новинарите. Здравствената агенција на ООН, СЗО, е мултилатерална институција основана во 1948 година. Работата и мисиите на оваа огромна машина од 7.000 вработени, кои се присутни низ целиот свет, зависат од финансирањето на земјите членки и од приватните донации.
