Кипарската црква се обидува да го реши „во семејството“ еден од најголемите скандали што ја засегаат и е поврзан со дејноста на монасите во манастирот Св. Аввакум во селото Фтерикуди.
Митрополитот на Тамасос и Оренис Исаија, во чија јурисдикција припаѓа манастирот, реши да стави катанец и да го предаде предметот на Светиот синод кој заседава утре и се очекува да ги размонаши двајца монаси фатени во сексуален скандал и во измама на верниците. Инаку, двајцата монаси откако беа откриени нивните нечесни активности, побараа да се распуштат пред да избие скандалот на виделина, пишуваат грчките медиуми.
Фактите поради „изгореа“ двајцата монаси се сексуалните средби во манастирските простории, кои дури биле снимени од видео камерите што самите си ги поставиле од безбедносни причини. Чувствувале целосна контрола над околината и не ги исклучувале камерите кои снимале сѐ.
Скандалот почнал да се разоткрива преку гласини за чудни случувања зад затворените манастирски врати кои стигнале до засегнатиот Митрополит по што била направена изненадувачка истрага и видеата пристигнале во неговиот кабинет. Кога монасите сфатиле дека не можат да го порекнат снимениот материјал, побарале да бидат размонашени.
Но, скандалот не се однесувал само на сексуалните односи, туку на целокупното работење на манастирот.
Имено, манастирот станал познат и по мироточењето на иконите и други „чуда“, како што се солзи од светците, поради што илјадници лековерни луѓе го посетувале Манастирот за да се поклонат, а оставале финансиски донации во вредност од неколку илјади евра.
Миро навистина капело од иконите пред очите на верниците, но за тоа се погрижиле самите монаси кои поставиле механизам што го канализирал мирото во иконата од контејнер што не бил видлив. Механизмот е откриен но никој не сакал да зборува за измамата за да не ги вознемири верниците.
„Чудата“ во манастирот често се прикажуваа на видеата на Јутјуб, додека монасите биле многу активни на социјалните мрежи, а присутни и во медиумите.
Кипарската црква по разоткривањето на скандалот изврши претрес на манастирот при што било откриено дека двајцата монаси во својата ќелија чувале големи суми пари, проценети на милион евра, како и злато и други вредни предмети.
Утврдено е и дека имаат банкарски сметки со големи депозити, а „вложувале“ и во купување на станови во Пиреја и Кипар. Становите монасите ги користеле за сопствени потреби.
Случајот не е пријавен во полиција и истрагата се спроведува во рамките на Црквата на Кипар.
