Бугарскиот премиер Румен Радев од Самитот ЕУ – Западен Балкан во Тиват испрати директна порака до Македонија: за да продолжи европскиот пат, земјата треба да ги впише Бугарите во Уставот. Во изјава за ДВ, Радев ја повтори позицијата на Софија дека уставните измени се условот што треба да го отвори патот кон следната фаза од преговорите со Европската Унија.
Пораката не е нова, но е политички значајна затоа што доаѓа во момент кога ЕУ во Тиват се обидува да го врати проширувањето како реална, а не само декларативна политика. Самитот е посветен на заедничката стабилност и просперитет на ЕУ и Западен Балкан, а лидерите разговараат за проширувањето, постепената интеграција и Планот за раст
Радев практично ја сведува бугарската позиција на една главна точка – впишување на Бугарите во македонскиот Устав. Но, токму тоа прашање веќе не е само билатерален спор меѓу Скопје и Софија, туку дел од европската преговарачка рамка. Европскиот советник Антонио Кошта при посетата на Скопје порача дека усвојувањето на договорените уставни измени останува единствениот пат кон формално започнување на преговорите.
